2 aprel ABŞ Silahlı Qüvvələrinin Azərbaycan əsilli əsgəri, ABŞ ordusunun kapralı Murad Rəhimovun doğum günüdür.
O, 1984-cü ildə Bakı şəhərində anadan olub. Azərbaycanın tanınmış opera müğənnisi Sona Aslanovanın nəvəsidir. Murad Amerikaya ailəsi ilə birlikdə dörd yaşı olan zaman köçüb. O, 2003-cü ildə Birləşmiş Ştatların İraqa müdaxiləsindən bir neçə ay sonra orduya yazılıb, San-Dieqodakı hərbi düşərgədə təlimlərə başlayıb. 2004-cü ilin fevral ayında onun xidmət etdiyi birləşmə təlimlər üçün Havay adalarına yerləşdirilib.
Burada avtomatçı kimi təlim alandan sonra sentyabr ayında o, ABŞ hərbi dəniz qüvvələrinin 1-ci Batalyonunun tərkibində İraqa göndərilib. Murad Rəhimov Fəllucə yaxınlığında ən şiddətli döyüşlərin getdiyi bir yerdə xidmət edib. O, fevral ayında İraqdan ABŞ-yə qayıtmalı idi. Yanvarın 25-də Murad Rəhimov qum tufanı zamanı baş vermiş vertolyot qəzasında 30 başqa Amerika əsgəri ilə birlikdə həlak olub. Həlak olan zaman Muradın 20 yaşı vardı. Murad Rəhimov San-Dieqoda yerləşən Fort Rosecrans məzarlığında dəfn edilib.
