Tanınmış modeli döyən iş adamı ifadə verib. Bu haqda bu gün, 24 aprel tarixində Bakuplus.az APA-ya istinadən xəbər verir.
Ziya Hüseynzadənin digər cinayət işi üzrə növbəti məhkəmə prosesi keçirilib. Təqsirləndirilən şəxs ifadəsində zərərçəkmiş kimi tanınan Kənan Rəsulov və onunla iş barəsində danışıb. O, Kənanı "Muğan Bank”ın şöbə müdiri olan dostuna görə tanıdığını və “Avropa Yenidənqurma və İnkişaf Bankı"na təqdim olunacaq hesabatlarda kömək etdiyini bildirib.
"2022-ci il yanvarın 6-da biz Kənan Rəsulovla 224 min dollarlıq xidməti müqavilə imzaladıq. 6 ay sonra isə hüquqi müqavilə imzaladıq. Bizim işimiz kreditin ayrılması ilə bağlı deyildi. Bu işləri Kənan özü edib”, – deyə Ziya bildirib.
O, həmçinin auditlə bağlı da açıqlama verib:
"Audit işi ilə bağlı 2019-2021-ci illər arasında müqavilə imzalamışıq. Layihədə qanunsuzluqlar isə 2022-ci ildə ortaya çıxıb. Bizə auditlə bağlı müraciət 2022-ci ilin ortasında olub. İlin ortasında müraciət olunub deyə audit üçün il sonunu gözləməli idik. Bizim audit apardığımız 2019-2021-ci illər arasında heç bir qüsur aşkarlanmayıb", – deyə o qeyd edib.
“PKF Audit Azerbaijan” və “PKF Audit Consulting” MMC-lərin təsisçisi olan Ziya Hüseynzadədənin məhkəmə prosesi 8 may tarixində davam edəcək.
