Novruz bayramına bir neçə gün qalıb. Bayramın ruhunu yaşamaq üçün hər kəs evini təmizləyir, süfrələrini bəzəyir, xüsusi yeməklər və şirniyyatlar hazırlayır.
Bu bayramda diqqəti çəkən əsas məqam süfrənin tərtibatıdır. Novruz hazırlıqları üçün Bakı sakinləri əvvəlcədən alış-veriş etmək üçün paytaxtda qurulan yarmarka və mağazalara üz tuturlar.
Əhali arasında sərfəli alış-veriş məkanlarından biri olan “Yaşıl bazar”da bayramqabağı vəziyyətin necə olduğunu öyrənmək üçün Bakuplus.az-ın əməkdaşı ora baş çəkib.
Diqqətimizi çəkən ilk məqam bazarda olan seyrəklik idi. Bayrama sayılı günlər qalmasına baxmayaraq, əvvəlki illər qədər sıxlıq müşahidə olunmurdu. Piştaxtalar bayram üçün bütün nemətlərlə dolu idi. Lakin alıcı qıtlığı hiss olunurdu.
Əvvəlcə Novruzun atributlarından olan səmənilərə nəzər yetirdik. Bazarda hər qiymətə səməni vardı. Baharın simvolunun ən aşağı qiyməti 3 manat idi.
Satıcı səməniləri fevral ayından satışa çıxardığını söyləyib:
“İlk çərşənbədən öncə səmənini satışa çıxardıq. Lakin mənə elə gəlir ki, insanlar çərşənbələri artıq qeyd etmirlər. Çünki çərşənbələrdə, demək olar, səməni alan yox idi. Son çərşənbəyə yaxın axın oldu. Lakin bu da əvvəlki qədər çox deyil”.
Digər bir satıcı da alıcılıq qabiliyyətinin kəskin şəkildə aşağı düşdüyündən şikayətlənib:
“Bayrama 3 gün qalır. Lakin axın yoxdur. Məhsullarda qiymət artımı yoxdur. Alıcılığın aşağı olması təəccüblü məqamdır. Marketlərə nisbətən bizdə daha ucuzdur”.
Bayram süfrəsini plovsuz təsəvvür etmək mümkün deyil. Plovun hazırlanmasında istifadə olunan düyülərə isə tələbat çoxdur. Qablaşdırılmış düyülər isə müxtəlif qiymətə satılır.
Bazarın çərəz satılan hissəsinə baş çəkdik. Çeşid çoxluğunu müşahidə etsək də, satıcılar alıcılıq qabiliyyətində artımın olmadığını söyləyiblər:
“Qabıqlı qoz 5-7 manata satılır, ləpəsi isə 15-17 manatdır. Fındıq 8, ləpəsi 15, badam ləpəsi 24, iydə 8, xurma 10-15, innab 8, qaysı 15 manatadır. Qarışıq meyvə qurusu 12-22 manat, tumsuz xurma 15 manat, tumlu 8 manat, alma və armud qurusu 4-10 manatdır. Şabalıd 3,5-10 manat, qaysı 14-20 manat, sarı kişmiş 8-20, alça qurusu 6-10, gavalı qurusu 4-15 manat aralığında satılır. Qiymətlər normaldır. Bayramla əlaqədar bahalaşma yoxdur”.
Meyvə-tərəvəz məhsullarının satıcısı bazarda alıcıların sayının azalmasını iri marketlərlə əlaqələndirir:
“Bazarda hər şey ucuz olsa da, məhsulları alan yoxdur. Pomidor 4-5 manat, xiyar 3-4 manat, kartof və soğan 1.5-2 manatdır. Armud 4, portağal 5, heyva 4, banan 3 manatdır. Qiymətlər bundan aşağı ola bilməz”.
Digər satıcı isə alıcılıq qabiliyyətinin son bir neçə ayda aşağı düşdüyünü əlavə edib:
“Bəziləri bayramqabağı bahalaşma səbəbindən alıcılıq qabiliyyətinin aşağı olduğunu düşünür. Lakin bayram ilə əlaqəsi yoxdur. Bir neçə ay öncədən durğunluq müşahidə edilir”.
Ümid edirik ki, alıcıların süfrəsi, satıcıların da cibi bu bayramda boş qalmaz.
Nəzrin Vahid
