Bu gün Azərbaycanın tanınmış müğənnisi, "Karvan" qrupunun solisti Sevil Hacıyevanın anım günüdür.
Bakuplus.az xatırladır ki, Sevil Hacıyeva 3 oktyabr 1968-ci ildə Bakı şəhərində anadan olub. Azərbaycan Dövlət Konservatoriyasının fortepiano şöbəsində təhsil alıb. Gənc yaşlarından musiqi fəaliyyətinə başlayan sənətçi qısa müddətdə istedadı ilə diqqət çəkib və müxtəlif musiqi tədbirlərində çıxış etməyə başlayıb.
1980-ci illərin sonlarında Azərbaycanın məşhur səslərindən biri kimi tanınan Sevil Hacıyeva "Bakı Payızı-88" və "Yurmala-89" müsabiqələrinin laureatı olub. "Yurmala-89"da gənc musiqiçilərin yarışında iştirak edən müğənni Aygün Kazımovanı da geridə qoyaraq müsabiqənin finalına yüksəlib.
Sevil Hacıyevanın səhnə fəaliyyətinin əsas hissəsi 1980-ci illərin əfsanəvi musiqi qruplarından olan "Karvan"la bağlıdır. Qrup 1993-cü ildə dağıldıqdan sonra müğənni Bakı səhnələrində bir daha görünməyib.
1996-cı il sentyabrın 8-də Ian Mussman adlı ABŞ vətəndaşı ilə evlənən Sevil Hacıyeva həyatının yeni mərhələsinə qədəm qoyub. Vərəm xəstəliyindən müalicə olunaraq sağalıb, daha sonra Los-Ancelesdə konservatoriyada təhsil almağa başlayıb. Şəhərin prestijli klublarından birində səhnəyə çıxan müğənni "məhdud iş imkanı üçün icazə verilən xarici tələbə" statusu alıb və Sosial Təhlükəsizlik koduna sahib olub.
Lakin Sevil Hacıyevanın Amerikadakı həyatı da uzun çəkməyib. 12 sentyabr 2000-ci ildə müğənninin həyatı faciəli şəkildə sona çatıb. O, Qərbi Hollivudda Şimali Robertson Bulvarının 470-ci blokunda bir şəxslə gəzərkən soyğunçunun hücumuna məruz qalıb. Soyğunçu pul tələb edib və Sevil Hacıyevanın pul kisəsini götürməyə çalışıb. Hadisə yerindən qaçan müğənni arxadan güllələnərək öldürülüb.
Onunla birlikdə olan şəxs isə soyğunçu ilə mübarizə apararkən sifətindən güllə yarası alıb. 31 yaşında həyatını itirən Sevil Hacıyeva Hollivud-Hillsdəki "Forest Lawn" qəbiristanlığında dəfn olunub.
