Araik Arutyunyanın vəziyyəti yaxşıdır, o, saxlanma şəraitindən razıdır və heç bir narazılıq bildirməyib. Bu haqda bu gün, 14 oktyabr tarixində Bakuplus.az Axar.az-a istinadən məlumat verir.
Arutyunanın vəkili Alov Səfərəliyevin sözlərinə görə, həbsdə olan şəxsin müdafiəsi üçün hər bir şərait yaradılıb.
“Kitab istəyirdi, təmin edilib. Araik ailəsi ilə əlaqə saxlayıb. Onun müdafiəsi ilə əlaqədar bütün lazımi tədbirlər tərəfimdən həyata keçirilir. Beynəlxalq təşkilatlardan hələ ki onunla görüşən olmayıb. Ailəsi və yaxud yaxınları tərəfindən sovqat göndərən də yoxdur. Azərbaycan qanunvericiliyinə görə, xarici vəkillərin Azərbaycan Respublikası ərazisində vəkillik fəaliyyəti ilə məşğul olmasına icazə verilmir. Araikin yeganə vəkili mənəm. Vəkil olaraq heç bir çətinliyim yoxdur. Digər məsələlər istintaq sirri sayıldığı, verilən hər hansı informasiya müdafiə etdiyim şəxsin əleyhinə yönələ biləcəyi üçün əlavə məlumat verə bilməyəcəyəm. İstintaq bitəndən və iş məhkəməyə gedəndən sonra Araik Arutyunyanın özünün icazəsi ilə ictimaiyyətə açıqlama verəcəyəm”, - deyə o bildirib.
