Bakının Xətai rayonunda ər-arvadın mübahisəsi cinayətlə nəticələnib.
Bakı şəhər sakini, 1979-cu il təvəllüdlü Namaz ailə münaqişəsi zəminində həyat yoldaşı Naibə (adlar şərtidir – red.) ilə mübahisə edib.
İstintaqa görə, 47 yaşlı kişi mübahisə zamanı ayaq zərbələri ilə arvadının bədəninin müxtəlif nahiyələrindən vuraraq onu döyüb.
Faktla bağlı Namaza Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən Namaz özünü təqsirli bilib. O, ifadəsində bildirib ki, yoldaşı ilə uzun müddətdir yola getmirlər və Naibə sözünə qulaq asmır, ondan icazəsiz özbaşına addımlar atır.
Təqsirləndirilən şəxs deyib ki, hadisə günü evdə aralarında sözlü mübahisə yaranıb. Belə ki, Naibə ondan avtomobilini ustaya apararaq düzəltdirməsini və bütün xərcləri ödəməsini istəyib. Bu səbəbdən aralarında dava düşüb. Mübahisənin 2-3 dəqiqə davam etdiyini deyən Namaz əsəbiləşərək arvadını yerə yıxıb və bir neçə dəfə təpiklə vurduğunu bildirib. O, hadisə zamanı iki azyaşlı övladlarının da evdə olduğunu qeyd edib.
Xətai Rayon Məhkəməsinin hökmü ilə Namaza 300 saat ictimai işlər növündə cəza təyin edilib. Cəza müddətinin başlanğıcı onun cəzanın çəkilməsinə cəlb olunduğu vaxtdan hesablanacaq.
mənbə: demokrat.az
