Azərbaycan Yerüstü Nəqliyyat Agentliyi taksilər üçün dayanacaq yerləri müəyyənləşdirəcək. Bu haqda bu gün, 15 avqust tarixində Bakuplus.az agentliyə istinadən xəbər verir.
Prezident İlham Əliyevin fərmanı ilə “Azərbaycan Yerüstü Nəqliyyat Agentliyinin Nizamnaməsi” yenilənib. Agentlik indi aşağıdakı vəzifələri yerinə yetirəcək:
- Bakı şəhərində taksi və müntəzəm sərnişindaşımalar üçün dayanacaq yerlərinin müəyyənləşdirilməsi, quraşdırılması və idarə olunması;
- Dövlət avtomobil yollarında parklanma yerlərinin təşkili və idarəsi, bələdiyyə və özəl yollarla bağlı nəzarət;
- Nəqliyyat qovşaqları, yeni avtomobil dayanacaqları və mühafizə olunan duracaqların yaradılması və idarəsi;
- Piyada-yol infrastrukturunun təşkilində iştirak;
- Yol nişanları və digər texniki vasitələrin yerlərinin müəyyənləşdirilməsi və quraşdırılması;
- Avtomobil yollarının norma və tələblərə uyğunluğunu monitorinq etmək və zəruri tədbirlər görmək;
- Planlaşdırma layihələrində insan və yük daşınması tələblərinin təmin olunması üçün rəy vermək;
- Yol infrastrukturu layihələrinə uyğunluq baxımından rəy vermək;
- Tıxac səbəblərini araşdırmaq, təhlil etmək və təkliflər vermək;
- Ticarət və sənaye obyektlərinin yükdaşımaları ilə bağlı təkliflər hazırlamaq.
Agentliyin yeni hüquqları:
- Müntəzəm sərnişindaşımalar üçün avtomobil qarajlarında nəqliyyat vasitələrinin ödənişli saxlanılması;
- Nəqliyyat vasitələrinin texniki və tibbi yoxlamalarının ödənişli qaydada həyata keçirilməsi;
- Dayanacaq məntəqələrində ödəniş alətlərinin quraşdırılması.
