Nüfuzlu “WorldSkills”təşkilatının turnirləri start götürüb.
Bakuplus.az Peşə Təhsili üzrə Dövlət Agentliyinə istinadən xəbər verir ki, sentyabrın 10-da Fransanın Lion şəhərində 47-ci Beynəlxalq WorldSkills yarışlarının rəsmi açılış mərasimi baş tutub.
Ölkəmiz bu yarışlarda 6 bacarıq üzrə (qaynaq, aşpazlıq, veb-texnologiyalar, 3D rəqəmsal oyun, kiber-təhlükəsizlik və saç ustası) təmsil olunur.
Beynəlxalq “WorldSkills” yarışları hər iki ildən bir təşkil edilməklə peşə təhsili sahəsində dünyanın ən böyük və nüfuzlu tədbiridir. 10-15 sentyabr tarixlərində baş tutacaq turnirdə 70 ölkədən 1400 iştirakçı 65 fərqli ixtisas üzrə yarışacaq.
Yarışlar çərçivəsində dünyada peşə təhsili sahəsinin inkişafı istiqamətində fəaliyyət göstərən beynəlxalq şirkət və tərəfdaşlar da daxil olmaqla bir sıra görüşlərin keçirilməsi, qabaqcıl təcrübənin öyrənilməsi və müvafiq sahələrdə əməkdaşlıq perspektivlərinin müzakirə edilməsi nəzərdə tutulur.
