Sosial şəbəkələrdə “Azərbaycan mafiyası” kimi tanınan və Sankt-Peterburq sakinlərinə hücumları ilə məşhurlaşan qrupun rəhbəri, 17 yaşlı Tural Məmmədov Bakıda tutulub. Bu haqda bu gün, 3 noyabr tarixində Bakuplus.az SPB Dnevnik.ru-ya istinadən məlumat verir.
Bildirilir ki, Məmmədov Telegram-da “Avaranın həyatı” (“Жизнь бродяги”) kanalını idarə etmişdir, bəzi paylaşımlar “Azərbaycan mafiyası” kimi işarə olunmuşdur.
“Mafiya”nın üzvləri Sankt-Peterburq sakinlərinə hücum edərək onları döydükləri videoları sayəsində məşhurlaşıblar. Faktlarla bağlı cinayət işləri açılıb. Dəstənin 12 üzvü artıq saxlanılıb, Məmmədov isə qaçdığı üçün beynəlxalq axtarışa verilib. Hazırda o, həbsdədir və Bakıdan Rusiyaya ekstradisiyası gözlənilir.
“Sankt-Peterburq və Leninqrad vilayətinin Azərbaycan Milli-Mədəni Muxtariyyəti” şəhər ictimai təşkilatının mətbuat katibi Rəşadə Orucova təsdiqləyib ki, ekstradisiya ilə bağlı Rusiyadan sorğu göndərilib. O, onu da qeyd edib ki, Məmmədovun diaspor fəaliyyəti ilə heç bir əlaqəsi yoxdur, lakin ictimai təşkilatın rəhbəri Vaqif Məmişev blogerin ailəsi ilə əlaqə saxlayıb. Məmmədovun valideynləri onun əməlindən peşman olduqlarını bildirib və şəhər sakinlərindən üzr istəyiblər.
