Bakı hava limanında külli miqdarda diş implantlarının gömrük sərhədindən qaçaqmalçılıq yolu ilə keçirilməsi cəhdinin qarşısı alınıb. Bu haqda bu gün, 18 noyabr tarixində Dövlət Gömrük Komitəsinin mətbuat xidməti məlumat verib.
İstanbuldan gələn Azərbaycan vətəndaşı Tünzalə Nəsirova qanunsuz olaraq ölkəyə 128 ədəd diş implantı gətirməyə cəhd edib. Onun həkimin köməkçisi kimi işlədiyi müəyyən olunub.
MəIumatda qeyd edilir ki, son zaman bəzi şəxslər bu tipli dərmanları qaçaqmalçılıq yolu ilə ölkəyə gətirməyə cəhd ediblər. Həmin əşyaların gömrük nəzarətinə bəyan edilmədən gömrük sərhədindən keçmək üçün digər sərnişinlər arasında paylanması halları olur.
Diş implantları və implantlar üçün detalların idxalı sanitariya-gigiyena qaydalarına riayət olunmaqla Səhiyyə Nazirliyinin icazəsi ilə həyata keçirilir. Həmin tibbi ləvazimatların müvafiq qaydalara əməl edilmədən ölkəyə gətirilməsi yoluxucu xəstəliklərin yayılma riskini artırır.
