Vaxtında qızılcaya qarşı peyvənd olunmayan 11-40 yaşlı əhali arasında peyvənd tədbirlərinin aparılması üçün Səhiyyə Nazirliyi tərəfindən ölkəyə müvafiq vaksin preparatları gətirilib. Bu haqda bu gün, 25 dekabr tarixində Bakuplus.az Səhiyyə Nazirliyinə istinadən məlumat verir.
Nazirlikdən verilən məlumata görə, bu ilin əvvəlindən Avropa regionunda qızılca xəstəliyinin yayılması nəticəsində Azərbaycanın müxtəlif bölgələrində infeksiyanın lokal yayılması davam edir.
Ölkədə 10 yaşa qədər uşaqlarla yanaşı, 10 yaşdan yuxarı uşaqlar və böyüklər arasında da yoluxma hallarına rast gəlinir.
Əhalinin sağlamlığının qorunması və infeksiyaların qarşısının alınması məqsədilə ölkədə mövcud profilaktik peyvənd təqviminə uyğun olaraq 10 yaşadək uşaqların, habelə 10 yaşdan yuxarı şəxslərin qızılca infeksiyasına qarşı peyvənd edilməsi vacib hesab edilir.
“Qeyd olunan əhali qruplarının vaksinasiyası üçün yaşayış yerləri üzrə uşaq və böyük əhaliyə ambulator-poliklinik xidmət göstərən tibb müəssisələrinə müraciət edilməsi tövsiyə olunur. 11-40 yaş əhali qruplarının yoluxmadan müdafiəsi üçün 1 dəfə vaksinasiya olunması kifayət edir”, – Səhiyyə Nazirliyinin açıqlamasında bildirilir.
