Azərbaycanda İran İslam Respublikasının xüsusi xidmət orqanları ilə əməkdaşlığa cəlb olunmuş vətəndaşların məhkəməsi başlayır. Bu haqda bu gün, 29 sentyabr tarixində Bakuplus.az APA-ya istinadən məlumat verir.
Proses Bakı Ağır Cinayətlər Məhkəməsində hakim Şəlalə Həsənovanın sədrliyi ilə aparılır. Hazırlıq iclası zamanı təqsirləndirilən şəxslərin vəkilləri işlə tanış olmaq üçün vaxt istəyiblər. Bu səbəbdən məhkəmə prosesi oktyabrın 5-də davam edəcək.
Cari ilin aprel ayında Azərbaycan Respublikasının Daxili İşlər Nazirliyi, Dövlət Təhlükəsizliyi Xidməti və Baş Prokurorluğun əməkdaşları tərəfindən İran İslam Respublikasının xüsusi xidmət orqanları tərəfindən pul müqabilində və dini təbliğat nəticəsində qulluğa cəlb edilmiş şəxslər tərəfindən törədilməsi planlaşdırılan cinayətlərin qarşısının alınması istiqamətində birgə xüsusi kompleks tədbirlər həyata keçirilib.
İstintaq zamanı məlum olub ki, İranda yaşayan və İran xüsusi xidmət orqanları ilə əməkdaşlıq edən Rufulla Axundzadə və Bəxtiyar Bayramov Tərtər rayon sakini Arif Cümşüdovu əməkdaşlığa cəlb edərək Azərbaycan ərazisində silahlı iğtişaşlar yaratmaq üçün “müqavimətçi dəstə” yaratmağı tapşırıblar. Dəstə ölkənin konstitusiya quruluşunu zorla dəyişdirmək və şəriət qanunları ilə idarə olunan “Kərimə” dövlətini yaratmaq məqsədilə yaradılıb.
Arif Cümşüdov göstəriş əsasında dini radikalizmi təbliğ edən tanışlarını – Tərzan Qaraşov, Sənan Məmmədov, Xəqani Məmmədov və İqbal Axundovu bu plana cəlb edib.
O, evində mütəmadi olaraq gizli görüşlər təşkil edərək, Rufulla Axundzadə və Bəxtiyar Bayramovun göstərişlərini adıçəkilən şəxslərə çatdırıb. Qrup üzvləri də öz növbəsində əməkdaşlığa yeni insanları cəlb etməyə çalışıb və bu barədə Axundzadəyə məlumat veriblər.
Bundan əlavə, Axundzadə Bakı sakini Anar İsayevi əməkdaşlığa cəlb etmiş, həmçinin ona Azərbaycan ərazisində silahlı iğtişaşlar yaratmaq, ölkənin konstitusiya quruluşunu zorla dəyişdirmək və bu məqsədlə “müqavimətçi dəstə” yaratmağı tapşırmışdı. Bunun müqabilində o, külli miqdarda pul, silah və hərtərəfli dəstək vəd edib, həmçinin İsayevi koordinasiya və birgə fəaliyyət üçün Cümşüdova təqdim edib.
Həmin şəxslər cəmiyyətdə dindar kimi mövqe tutaraq sosial şəbəkələrdə, insanların çox olduğu yerlərdə dini radikalizmi və İranı təbliğ edib, Azərbaycanda dini tolerantlıq ənənələrinin pozulması ilə bağlı xaricdən alınan göstərişləri yerinə yetiriblər.
Bundan başqa, qrup üzvləri məqsədyönlü şəkildə İrandan gətirilən narkotik vasitələrin satışını təşkil ediblər və əldə edilən külli miqdarda vəsait Azərbaycanda dini radikalizmin təbliği və digər təxribat xarakterli işlərə xərclənib.
