Azərbaycanda Aİ-92 benzinin və dizlein qiymətləri qalxıb, Aİ-95 benzinin qiymətləri isə aşağı salınır. Bu barədə bu gün, 1 iyul tarixində Bakuplus.az Tarif Şurasına istinadən məlumat verir.
Aİ-92 markalı avtomobil benzininin pərakəndə satış qiyməti 1 litr üçün 10 qəpik artırılaraq 1,10 manat, dizel yanacağının pərakəndə satış qiyməti isə 1 litr üçün 20 qəpik artırılaraq 1 manat müəyyən edilib.
Ayın 15-dən etibarən Aİ-95 benzininin qiyməti 1,60 manata aşağı salınacaq.
Həmçinin bu gündən etibarən metro və şəhərdaxili avtobus marşrutlarında sərnişindaşıma xidmətinin tarifi 0,40 manatdan 0,50 manata qalxıb. Bakı-Sumqayıt avtobuslarında gediş haqqı 70 qəpik olub.
Bununla yanaşı, ötən axşamdan taksi daşımaları da bahalaşıb. Bu, qüvvəyə minmiş yeni qaydalarla əlaqəlidir.
Qiymətlərin dəyişməsinə səbəb SOCAR-nin Heydər Əliyev adına neft emalı zavodunda (NEZ) aparılan yenidənqurma və modernizasiya işlərinin ilkin mərhələsi üzrə işlərin tamamlanmaq üzrə olmasıdır. Zavodda mövcud modernizasiya işləri 10 il ərzində aparılmışdır. Görülmüş işlər nəticəsində NEZ-də istehsal olunan Aİ-92 və Aİ-95 markalı avtomobil benzinləri artıq Avro-5 standartlarına çatdırılıb.
