Azərbaycanda istilik və isti su təchizatı xidmətləri bu ildən fiziki şəxslərə müqavilə əsasında veriləcək. Bu dəyişiklik Nazirlər Kabinetinin 5 sentyabr 2023-cü il tarixli qərarı ilə təsdiq olunmuş "İstilik enerjisindən istifadə qaydaları”nın 1.4-cü bəndində öz əksini tapıb. Bu haqda bu gün, 3 noyabr tarixində Bakuplus.az Real TV-yə istinadən məlumat verir.
“Azəristiliktəchizat” ASC-nin şöbə rəisi Xəqani Süleymanlının sözlərinə görə, müqavilə qurum və istehlakçı arasında müvafiq sənədlər əsasında imzalanır. Müqavilə bağlamaq üçün əməkdaşlar mənzillərə yaxınlaşıb, vətəndaşlardan müvafiq sənədləri (şəxsiyyət vəsiqəsi və mənzilin çıxarışı) tələb edib müqavilə bağlayacaqlar.
“Burada abonentlərin hüquq və vəzifələri, istehlakçı müəssisənin hüquq və vəzifələri, öhdəlikləri müəyyən olunur, hesablama qaydası müəyyən olunur. Bu məsələdə abonentlər özü maraqlı olmalıdırlar, çünki gələcəkdə həmin müqaviləyə əsasən, onlar keyfiyyətli istilik enerjisini təchizatçı müəssisədən tələb edə biləcəklər”, – deyə Süleymanov əlavə edib.
Müqavilə bağlamaqdan boyun qaçıran abonentlərin istiliyi fərdi şəkildə dayandırılacaq.
Soyuq havalarda ən aktual mövzulardan biri də təhsil ocaqlarının istiliklə təmin olunması məsələsidir. “Azəristiliktəchizat” ASC qışın sərt keçdiyi əksər bölgələrin məktəb, bağca və bir sıra müəssisələrini istiliklə təmin edəcək.
Xəqani Süleymanlı, həmçinin bildirdi ki, bu istilik mövsümündə 286 təhsil müəssisəsinin, 158 uşaq bağçasının, 150 səhiyyə obyektinin, ümumilikdə 3863 yaşayış binasının və 184 mindən çox mənzilin istiliklə təmin olunması nəzərdə tutulub.
