Xüsusi təyinatlı polis bölməsinin (OMON) keçmiş əməkdaşı, dövlət çevrilişinə cəhddə iştirak etməkdə təqsirli bilinən 50 yaşlı Fuad Əhmədov yenidən həbs edilib. Bu dəfə keçmiş xüsusi təyinatlı əməkdaş narkotik alverində və qaçaqmalçılıqda ittiham olunaraq azadlıqdan məhrum edilib. Bu haqda bu gün, 17 iyul tarixində Bakuplus.az Oxu.az-a istinadən məlumat verir.
Daşıyıcı şirkətlərdən birinin avtomobilində taksi sürücüsü işləyən Əhmədov 1500 manat mükafat müqabilində İrandan Azərbaycana narkotik vasitələrin daşınmasına razılaşıb. O, Şahbaz adlı şəxsdən alınan narkotik maddə ilə gömrük keçid məntəqəsindən keçərkən saxlanılıb.
Əhmədov narkotik vasitəni Şahbazın Bakıdakı evinə göndərəcəyi şəxsə verməli idi. Keçmiş omonçu həbsdən sonra bu barədə əməliyyatçılara məlumat verib. Onunla birlikdə narkotik vasitə əldə etməyə cəhd edən Azər İbrahimov da saxlanılıb.
Hər iki şəxs Cinayət Məcəlləsinin “Külli miqdarda qanunsuz narkotik dövriyyəsi”, “Qanunsuz olaraq narkotik vasitələri, psixotrop maddələri əldə etmə, saxlama, daşıma, göndərmə, qabaqcadan əlbir olan bir qrup şəxs tərəfindən törədildikdə” və “Qaçaqmalçılıq – qabaqcadan əlbir olan bir qrup şəxs tərəfindən törədildikdə” maddələri ilə təqsirli bilinirlər.
Bakı Ağır Cinayətlər Məhkəməsində hakim Əli Məmmədovun sədrliyi ilə keçirilən prosesdə işə baxılıb. Hökmə əsasən, Əhmədov 11 il, İbrahimov isə 10 il 6 ay müddətinə azadlıqdan məhrum ediliblər.
