AZAL aviaşirkəti Bakı-Naxçıvan arasında reyslərə aviabiletlərin alınması prosedurunu asanlaşdıracaq: yaxın vaxtlarda biletləri yalnız aviaşirkətin rəsmi internet saytından - www.azal.az-dan onlayn almaq mümkün olacaq. Bu haqda bu gün, 17 iyun tarixində Bakuplus.az AZAL-a istinadən məlumat verir.
Bu istiqamətdə aviabiletlərin onlayn satışına tam keçidin dəqiq tarixi daha sonra açıqlanacaq.
Bakı-Naxçıvan və Naxçıvan-Bakı istiqamətləri üzrə aviabiletlərin qiyməti Azərbaycan vətəndaşları üçün 60 manat, xarici ölkə vətəndaşları üçün isə 70 manat təşkil edir.
Həmçinin 18 yaşa qədər uşaqlar, tələbələr, eləcə də I və II qrup əlillər üçün 10 manat güzəşt tətbiq edilir. Yalnız bu kateqoriyadan olan sərnişinlər aviabiletləri aviaşirkətin Bakı və Naxçıvan hava limanlarındakı rəsmi kassalarından ala biləcəklər. Həmin sərnişinlər biletləri alarkən müvafiq sənədlərini təqdim etməlidirlər.
AZAL hər gün Bakı-Naxçıvan-Bakı marşrutu üzrə 4 müntəzəm reys həyata keçirir və aviaşirkətin tələbatından və texniki imkanlarından asılı olaraq, bu marşrut üzrə əlavə reyslər həyata keçirir.
