Sərnişinlərin artan tələbatına cavab olaraq AZAL Bakı-Naxçıvan-Bakı marşrutu üzrə gündəlik uçuşların sayını artırmaqda davam edir. Belə ki, bu istiqamətdə gündə 4 müntəzəm uçuş yerinə ən azı 12 reys təmin olunur. Bu haqda bu gün, 6 iyul tarixində Bakuplus.az aviaşirkətə istinadən məlumat verir.
Hava daşımalarına artan tələbatı nəzərə alaraq, aviaşirkət bütün digər sərnişinlərə səyahətlərini əvvəlcədən planlaşdırmağı və uçuş tarixindən üç və ya daha çox gün əvvəl bilet kassasına yaxınlaşmağı tövsiyə edir. Biletləri əvvəlcədən almaq onlara mümkün narahatlıqdan qaçmağa kömək edəcək.
Sərnişinlər Bakı-Naxçıvan-Bakı marşrutu üzrə aviabiletləri aviaşirkətin www.azal.az saytından, AZAL-ın rəsmi kassalarından, callcenter@azal.az elektron poçt ünvanı vasitəsilə və ya +994(55) 204 65 54 WhatsApp nömrəsi vasitəsilə çağrı mərkəzinə müraciət etməklə əldə edə bilərlər.
Hazırda Bakı-Naxçıvan və Naxçıvan-Bakı istiqamətlərində biletlərin qiyməti Azərbaycan vətəndaşları üçün 60 manat, xarici ölkə vətəndaşları üçün isə 70 manat təşkil edir.
Bundan əlavə, 18 yaşınadək əlil uşaqlar, tələbələr, həmçinin I və II qrup əlillər üçün 10 manat güzəşt tətbiq edilir. Yalnız bu kateqoriyadan olan sərnişinlər aviabiletləri aviaşirkətin Bakı və Naxçıvan hava limanlarındakı rəsmi kassalarında əldə edə bilərlər. Həmin sərnişinlər biletləri alarkən müvafiq sənədləri təqdim etməlidirlər.
