Son dövrlərdə meymunçiçəyi virusunun yeni ştamı ilə bağlı xəbərlər ciddi narahatlıq doğurub. Sentyabrdan bu yana 3 mindən çox insanın yoluxduğu bildirilib və yeni ştamın ilk dəfə ABŞ-də də qeydə alınması, bu virusun yayılma potensialının artdığını göstərir.
Meymunçiçəyi virusu, əvvəllər nadir hallarda insanlarda görülən, lakin son illərdə daha geniş yayılmağa başlayan bir zoonotik (heyvanlardan insana keçən) infeksiyadır. Əvvəllər Afrika qitəsində daha çox rastlanan bu xəstəlik, 2022-ci ildən sonra qlobal olaraq daha çox insan arasında yayılmağa başladı. Xüsusilə, virusun cinsi yolla yayılma qabiliyyəti, onun daha sürətlə genişlənməsinə səbəb olub.
Mütəxəssislər virusun daha çox insana yoluxa bilməsi və daha ciddi fəsadlara yol açma potensialı ilə əlaqədar xəbərdarlıq edir. ABŞ-də qeydə alınan yeni ştamın sürətlə yayılması, tədbirlərin gücləndirilməsini və təhlükəsizlik protokollarının yenidən nəzərdən keçirilməsini zəruri edir.
Bəs görəsən, ölkəmizdə bu virusun aşkarlanma ehtimalı varmı?
Mövzu ilə bağlı Bakuplus.az-a açıqlama verən infeksionist Mərdan Əliyevin sözlərinə görə, meymunçiçəyi virusu ölkəmizdə çox az insanlarda aşkarlana bilər:
[caption id="attachment_158460" align="alignnone" width="640"]
Mərdan Əliyev[/caption]
“Meymunçiçəyi xəstəliyi koronovirusdan tamam fərqli bir virusdur. Başqa bir qrupa daxildir. Bununla yanaşı virusun yoluxma halları və əlamətləri də tamam fərqlidir. Bizə gəlmə ehtimalı çox deyil. Ola bilər ki, ölkəmizdə tək-tək hallarda aşkarlansın. Daha çox yaxın təmas nəticəsində yoluxma halı aşkarlanır, çünki oranın ab-havası fərqlidir. Bizdə elə adət-ənənələr olmur”.
M.Əliyev qeyd edib ki, meymunçiçəyi xəstəsini aşkar etmək çox asandır:
“Meymunçiçəyində simptomlu gediş olur. Koronavirus kimi simptomsuz olmur. Xəstə kənardan asanlıqla seçilir. Xəstəni müşahidə etsək, xəstə gizli saxlamaq istəsə belə onun əllərinə və üzünə fikir versək, asanlıqla xəstə olduğunu biləcəyik.
Xüsusi səpkilər olur. Səpkisinin digər şəxsin dərisinə təması ilə yoluxma qeydə alına bilər. Koronovirus hava-damcı yolu ilə ötürülürdü. Simptomsuz formaları var idi. Meymunçiçəyində isə yaxın təmasla keçir. Bizə gəlmə ehtimalı çox azdır”.
Nəzrin Vahid
