Cari ilin yanvar ayında 252, fevral ayında 131, mart ayında 176, aprel ayında isə 139 bioloji qohumluğu olan şəxslər arasında nikah qeydə alınıb.
Bu barədə Ədliyyə Nazirliyindən trend.az-ın sorğusuna cavab olaraq bildirilib.
Vurğulanıb ki, 2024-cü ilin yanvar ayında 155, fevral ayında 113, mart ayında 116, aprel ayında 111, may ayında isə 121 belə nikah qeydə alınıb.
Qeyd edilib ki, 2021-ci ildə 2 199, 2022-cü ildə 2 542, 2023-cü ildə 1 950, 2024-cü ildə 2 060, 2025-ci ilin ilk 4 ayı ərzində isə 698 belə nikah rəsmiləşdirilib.
Bu o deməkdir ki, 2024-cü ilin ilk dörd ayında 495, 2025-ci ilin eyni dövründə isə 698 belə nikah qeydə alınıb.
Dövlət Statistika Komitəsindən isə bildirilib ki, qohumlar arasında bağlanılan nikahların sayına dair məlumatlar illik dövriliklə 2022-ci ilin yekunlarından başlayaraq işlənilir.
Ədliyyə Nazirliyinin qeydiyyat şöbələri tərəfindən rəsmi qeydə alınan qohumlar arasında bağlanılan nikaha daxilolma hallarının sayı 2022-ci ildə 1 915, 2023-cü ildə 1 935, 2024-cü ildə isə 2 034 olub.
Qeyd edək ki, Ailə Məcəlləsinə əsasən, bu şəxslər arasında nikahın bağlanmasına yol verilməyəcək: qardaşların və (və ya) bacıların ümumi bioloji baba və (və ya) nənəsi olan uşaqları; bioloji qohumluğu olan əmi (dayı) və qardaş (bacı) qızı, həmçinin bibi (xala) və qardaş (bacı) oğlu. Bu qadağa 2025-ci il iyulun 1-dən qüvvəyə minəcək.
