Aktyor Azər Aydəmir Bayır şəhər ərazisində aparılan genişmiqyaslı söküntü işləri ilə bağlı aidiyyəti qurumlara müraciət edib.
Bakuplus.az xəbər verir ki, o, sosial şəbəkə hesabında paylaşdığı müraciətdə söküntü aparılan ərazilərdə müvəqqəti mühafizə xidmətinin təşkil olunmasını xahiş edib.
Onun sözlərinə görə, son günlər söküntü aparılan və nəzarətsiz qalan ərazilərdə xoşagəlməz hallar artıb. Dağıntılar arasında və boş sahələrdə tualet kimi istifadə halları, spirtli içki və digər maddələrin qəbulu, həmçinin müxtəlif şəxslərin həmin ərazilərdə toplaşması müşahidə olunur.
Aktyor xüsusilə söküntü sahələrinin arasında yerləşən kiçik küçələrin, keçidlərin və qaranlıq ərazilərin axşam saatlarında sakinlər üçün təhlükə yaratdığını qeyd edib.
O, söküntü işləri tam başa çatana, dağıntılar ərazidən götürülənə və sahələr müvafiq qaydada bağlanana qədər ərazilərdə müvəqqəti mühafizəçilərin və ya mühafizə xidmətinin təşkil olunmasını, nəzarətin gücləndirilməsini və sakinlərin təhlükəsizliyinin təmin edilməsini istəyib.
Aktyor müraciətində məsələyə daha ciddi hadisə baş verməmişdən əvvəl diqqət yetirilməsinə çağırış edib.
Daxili İşlər Nazirliyindən aktyorun müraciətinə reaksiya gecikməyib. Qurumdan bildirilib ki, məsələ ilə bağlı müvafiq tədbirlər görülür.
