İspandilli ölkələr üzrə mütəxəssis Mahir Qurbanov Uruqvayın dövlət kanalı Canal 5-də İran tərəfindən Azərbaycan dövlətinə və ərazisinə qarşı hücumun detallarını təhlil edib.
Bakuplus.az xəbər verir ki, Mahir Qurbanov çıxışı zamanı Naxçıvan Muxtar Respublikasının ərazisini İran dövlətinin pilotsuz uçuş aparatları ilə atəş altına alması, hücumun hədəfinin mülki obyektlər olması, habelə Naxçıvan Beynəlxalq Hava Limanı, onun terminal binası və kənd məktəbinin İran tərəfindən atəşə məruz qalması barədə ətraflı məlumat verib
Mütəxəssis martın 5-də Prezident İlham Əliyevin sədrliyi ilə Təhlükəsizlik Şurasının iclasının keçirildiyini də vurğulayıb.
M.Qurbanov onu da qeyd edib ki, Azərbaycan dövləti heç vaxt İrana qarşı əməliyyatlarda iştirak etməyib və etməyəcək. Prezident İlham Əliyevin qeyd etdiyi kimi, bu, Azərbaycanın mövqeyidir.
Proqramda Qurbanov onu da qeyd edib ki, Azərbaycan Respublikasının Prezidenti İlham Əliyev Ayətullah Seyid Müctəba Hüseyni Xameneiyə İran İslam Respublikasının Ali Rəhbəri vəzifəsinə seçilməsi münasibəti ilə təbrik məktubu ünvanlayıb və bu məktubda dövlətlərarası əlaqələrimizin xalqlarımızın mənafelərinə uyğun olaraq qarşılıqlı hörmət və etimad məcrasında inkişafı naminə birgə səylər göstərəcəyimizə ümidvar olduğunu bildirib.
