Azərbaycanlı rəssam Ramina Səadətxan Latviyanın qalereyası tərəfindən beynəlxalq VIMA 2026 incəsənət sərgisində (Kipr) fərdi stendlə təmsil olunub və böyük uğur qazanıb.
Bakuplus.az xəbər ki, insanın daxili dünyasına, emosional transformasiyalara və intuitiv qavrayışa həsr olunmuş rəssamın fərdi ekspozisiyası beynəlxalq auditoriya tərəfindən yüksək qiymətləndirilib. Rəng və forma ilə ifadəli işləmə üzərində qurulan Ramina Səadətxanın unikal vizual dili sərginin ən çox müzakirə olunan təqdimatlarından birinə çevrilib. Rəssamın əsərləri sərgi ziyarətçilərinin böyük marağına səbəb olub və tamaşaçı səsverməsinin nəticələrinə əsasən Ramina Səadətxan "Audience Choice" mükafatının qalibi olaraq 1-ci yeri tutub.
VIMA 2026 çərçivəsində əldə olunan bu uğur müasir Azərbaycan incəsənətinin beynəlxalq sənət səhnəsində tanıdılması baxımından mühüm hadisə olub.
VIMA Art Fair — Kiprin Limassol şəhərində keçirilən beynəlxalq müasir incəsənət yarmarkasıdır. Burada müxtəlif ölkələrdən rəssamlar, qalereyalar, kolleksiyaçılar və kuratorlar iştirak edirlər. Tədbirin əsas məqsədi Şərqi Aralıq dənizi regionunun müasir incəsənətini beynəlxalq səviyyədə tanıtmaqdır.
"VIMA" sözü yunan dilində "addım", "platforma" və ya "tribuna" mənasını verir. Yarmarka özünü müxtəlif ölkələrin incəsənəti arasında körpü yaradan platforma kimi təqdim edir.
