“Yolda gedəndə sizə zəng gəlir və telefonla danışmaq zərurəti yaranır. Bu zaman avtomobili qısa müddətlik saxlamalı olursunuz. Avtomobilimizi paytaxt ərazisində park edərkən “AzParking” xidmətindən istifadə əlbəttə ki, zəruri və qaydalara uyğundur. Lakin bəzən elə hallar yaranır ki, bu zaman istər SMS vasitəsilə, istərsə də tətbiq üzərindən parklanma vaxtını aktivləşdirmək tələb olunur. Bax, bu nə dərəcədə məntiqlidir? Tutaq ki, hər hansı səbəbdən — düşünmək, nəfəs dərmək, yaxud səhhətinizdə narahatlıq hiss etdikdə — maşını dayandırmaq ehtiyacı yaranır. Dərhal “AzParking” əməkdaşları başının üstünü kəsdirir ki, siz avtomobildə oturmuş olsanız da, parklanma vaxtını aktiv etməlisiniz”.
Bu sözləri Bakuplus.az-a şikayət edən Bakı sakinlərdən biri deyib.
O deyir ki, mənim işim, deyək ki, 15 yox, 16 dəqiqə çəkərsə, bu, avtomatik olaraq 1 manatlıq ödəniş deməkdir: “Əgər ödənişi SMS vasitəsilə etsəniz, əlavə 20 qəpik də balansınızdan çıxılır. Bəli, bu məbləğlər gündəlik xərclərlə müqayisədə kiçik görünə bilər. Ancaq siz gündəlik taksi fəaliyyəti ilə məşğulsunuzsa və ya avtomobildən intensiv istifadə edirsinizsə, hər gün 3-4 manat bu cür hallara görə ödəniş etmək — xüsusilə də yalnız bir zəng və ya 10 dəqiqəlik fasiləyə görə — nə dərəcədə ədalətlidir? Nəticə etibarilə bu, aylıq 60-70 manat civarında əlavə xərcə səbəb ola bilər. Məncə məsul şəxslər sürücülərin həm hüquqi, həm də maliyyə mənafelərini nəzərə alaraq bu məsələləri yenidən nəzərdən keçirilməlidirlər. İndiki halda sanki sürücülərə düşmən kəsiliblər”.
Mövzu ilə bağlı Azərbaycan Yerüstü Nəqliyyat Agentliyinə sorğu göndərsək də, sorğumuza cavab verilməyib.
