Əksər rayonlardan Bakıya avtobusla gedən insanlar onlayn bilet ala bilmirlər. Bununla bağlı sosial şəbəkələrdə narazılıqlar artıb. Bu haqda bu gün, 20 iyun tarixində Bakuplus.az Bizim.Media-ya istinadən məlumat verir.
Sərnişinlərin sözlərinə görə, onlayn bilet sistemi bütün daşıyıcılara və avtovağzallara şamil olunmadığından onlar bu məsələdə çətinlik çəkirlər.
Lakin əksinə, Bakıdan, demək olar ki, bütün rayonlara gedən avtobuslara onlayn bilet almaq mümkündür. Narazı sərnişinlər rayonlardan paytaxta avtobusların gediş-gəlişi üçün müvafiq portalın tezliklə istifadəyə verilməsini tələb edirlər.
Azərbaycan Quru Nəqliyyat Agentliyindən (AYNA) bildirilib ki, biletim.az portalı agentliyin xidmətlərinin elektronlaşdırılması və nəqliyyat sahəsində rəqəmsal transformasiyanın təmin edilməsi istiqamətində aparılan işlər çərçivəsində fəaliyyət göstərir. Hazırda sərnişinlər paytaxt Bakıdan 27 stansiyaya və geriyə onlayn bilet alıb öz səfərlərini edə bilərlər. Onlayn bilet satışı sistemi mərhələli şəkildə sərnişindaşıma sahəsində xidmət göstərən bütün daşıyıcıları və avtovağzalları əhatə edəcək.
Portal vaxta qənaət, müştəri məmnunluğunun təmin edilməsi, ölkədə nağdsız ödənişlərin dövriyyəsinin artırılması baxımından bir sıra üstünlüklərə malikdir.
Bilet əldə etmək üçün sərnişinlər biletim.az saytına daxil olub qeydiyyatdan keçməlidirlər. Mobil cihazlar üçün “Biletim” mobil tətbiqini App Store və Google Play-dən yükləmək olar.
