Bakıda yeni stansiyanın istifadəyə veriləcəyi vaxt açıqlanıb. Bu haqda bu gün, 5 mart tarixində Bakuplus.az Oxu.az-a istinadən xəbər verir.
Bakı metropoliteninin “bənövşəyi” xəttinin hazırda inşası davam edən stansiyasında növbəti mərhələ üzrə işlərə başlanılıb. Şərti olaraq “B-04” adlandırılan stansiya Heydər Əliyev adına İdman-Konsert Kompleksi ilə 1 saylı Şəhər Klinik Xəstəxanası arasında - Cəlil Məmmədquluzadə küçəsində yerləşəcək.
“Bakı Metropoliteni” QSC-nin Mətbuat Xidmətinin rəhbəri Bəxtiyar Məmmədovun sözlərinə görə, stansiyanın tikintisi sürətlə davam edir.
“Qazıntı işləri tam başa çatıb. Keçidlərin inşası davam edir. Stansiya dörd səviyyədən ibarətdir, hər mərtəbədə son tamamlama işlərinə başlanılıb. Yəni bundan sonrakı dövrdə divar, döşəmə örtüyünün təmizlənməsi və üzlüyün vurulması üçün hazır vəziyyətə gətirilməsi işləri gedir. Növbəti mərhələdə üzləmə işləri aparılacaq. Həmçinin artıq infrastrukturun qurulması ilə bağlı bir sıra addımlar da atılıb, çünki platformalar da quraşdırılıb. Stansiyanı “8 Noyabr”la bağlayan yollar da çəkilib. Stansiyada bir səviyyədən digərinə keçmək üçün pilləkənlər və 19 eskalatordan istifadə olunacaq. Müvafiq kateqoriyadan olan sərnişinlərin ehtiyacları da nəzərə alınıb. Onların xidmətinə üç lift veriləcək”, - deyə rəsmi bildirib.
Qeyd olunub ki, hazırda gedən prosesdə heç bir problem olmazsa, sözügedən stansiyanın tikintisi 2025-ci ildə başa çatacaq.
