Növbəti tədris ilində birinci sinifdə oxuyan uşaqların elektron qeydiyyatına ərazi prinsipinin tətbiq olunduğu paytaxtın ümumi təhsil müəssisələrinin mikroəraziləri genişləndiriləcək. Bu haqda bu gün, 15 yanvar tarixində Bakuplus.az Bakı Şəhəri üzrə Təhsil İdarəsinə (BŞTİ) istinadən məlumat verir.
Süni şagird sıxlığının qarşısını almaq üçün ərazi prinsipi tətbiq olunan məktəblərdə ilk növbədə həmin təhsil müəssisələrinin mikroərazisində daimi qeydiyyatda olan vətəndaşlar övladlarını elektron sistem vasitəsilə qeydiyyatdan keçirə biləcəklər. Digər valideynlərə sıxlığı az olan məktəbləri seçmək imkanı veriləcək.
Əlavə məlumat üçün BŞTİ-nin Çağrı mərkəzinə (146-1) zəng etmək və ya dislocasiya@baku.edu.gov.az elektron ünvanına müraciət etmək tövsiyə olunur.
Ümumi təhsil müəssisələrinin I sinfinə qeydiyyat prosesi www.mektebeqebul.edu.az elektron portalı vasitəsilə həyata keçirilir.
