Paytaxtda yerləşən Böyükşor gölünün bir hissəsindən kəskin, spesifik qoxu gəlir. Xüsusilə yay aylarında göldən gələn üfunət dözülməz olur. Ehtimallardan biri çirkabın gölə axıdılmasıdır. Bu haqda bu gün, 19 iyul tarixində Bakuplus.az Bizim.Media-ya istinadən məlumat verir.
Ekologiya və Təbii Sərvətlər Nazirliyinin Xəzər Kompleks Ekoloji Monitorinq İdarəsinin rəisi Ceyhun Muradov bildirib ki, idarənin mütəxəssisləri tərəfindən göl ətrafında monitorinq və ölçmə işləri aparılıb, göldən gələn spesifik qoxuların yayılmasının müəyyənləşdirilməsi istiqamətində işlər aparılıb.
O qeyd edib ki, monitorinqlər zamanı qeyd olunan ərazidə spesifik qoxu müşahidə olunsa da, havanın keyfiyyətinin ölçülməsinin nəticələrinə görə, atmosfer havasında zərərli qaz qarışıqlarının miqdarı yol verilən hədlər daxilində olub:
“Aparılan monitorinq zamanı müəyyən edilib ki, Böyükşor gölündən gələn iy-qoxunun səbəbi havaların isti keçməsi nəticəsində göldə suyun buxarlanması, intensiv buxarlanma nəticəsində suyun səviyyəsinin aşağı düşməsi və açıqda qalmış lilli ərazilərdən iy-qoxunun ətrafa yayılmasıdır”, – nazirlikdən əlavə ediblər.
