Martın 10-u saat 14:00 radələrində paytaxtın Nəsimi rayonu, Səməd Vurğun küçəsində baş vermiş atışma ilə bağlı başlanmış cinayət işi üzrə Baş Prokurorluğun İstintaq İdarəsi tərəfindən istintaq aparılır. Bununla bağlı Baş Prokurorluq və DİN bu gün, 13 mart tarixində birgə məlumat yayıb.
Prokurorluq və DİN əməkdaşları tərəfindən keçirilmiş tədbirlər nəticəsində digər şəxslərlə qabaqcadan əlbir olan 28 yaşlı Şahmar İsmayılov və 25 yaşlı Vüqar Quliyev Nicat Əkbərovu (kriminal aləmdə Nicat Lənkəranski kimi tanınan şəxs) öldürmək istədikləri müəyyən edilib. Bu məqsədlə İsmayılov qanunsuz əldə olunmuş odlu silahdan atəş açıb, lakin Əkbərov atəşdən yayına bilib. Həmin vaxt hadisə yerində olan 40 yaşlı Tamerlan Hüseynov və 21 yaşlı Fəqan Rəhimli təsədüfən yaralanıblar.
İstintaq-əməliyyat tədbirləri nəticəsində şübhəli şəxs qismində saxlanılan Şahmar İsmayılov və Vüqar Quliyev Cinayət Məcəlləsinin 29, 120.2.1, 29, 120.2.4 (qabaqcadan əlbir olan bir qrup şəxs tərəfindən ümumi təhlükəli üsulla adam öldürməyə cəhd), 228.2.1 (qanunsuz olaraq odlu silah əldə etmə) və digər maddələri ilə təqsirləndirilən şəxs qismində cəlb olunaraq barələrində məhkəmənin qərarı əsasında həbs qətimkan tədbiri seçilib.
Baxış zamanı şübhəli bilinən şəxslərin idarə etdiyi avtomobildə 1 ədəd tapança, patron və gilizlər, eləcə də iş üzrə əhəmiyyət kəsb edən digər sübutlar aşkar edilərək götürülüb.
İstintaq davam edir, əlavə məlumat veriləcək.
Həmçinin APA-dan əldə olunan məlumata görə, həmin şəxslər barəsində 4 aylıq həbs qətimkan tədbiri seçilib.
