Bakının Binəqədi rayonu, A.Kunanbayev küçəsi yaxınlığında yerləşən mebel sexində partlayış baş verməsi nəticəsində 3 nəfər dünyasını dəyişib. Bu haqda bu gün, 15 yanvar tarixində Bakuplus.az Baş Prokurorluq və Fövqəladə Hallar Nazirliyinin birgə məlumatına istinadən xəbər verir.
Verilən məlumata görə, hadisə yerinə dərhal prokurorluq əməkdaşları və Fövqəladə Hallar Nazirliyinin qüvvələri cəlb olunublar. Ərazidə texniki vasitələr və canlı qüvvə tərəfindən yanğının söndürülməsi istiqamətində müvafiq tədbirlər görülüb. Hazırda yanğın məhdudlaşdırılıb.
Dağıntılar altında 3 nəfərin meyiti aşkar olunub, 24 nəfər müxtəlif dərəcəli xəsarətlər alıb. Onlardan 3 nəfər FHN-in əməkdaşları tərəfindən axtarış-xilasetmə işləri zamanı dağıntılar altından sağ çıxarılıb. Xəsarət alanlardan 6 nəfər ilkin tibbi yardım göstərildikdən sonra evə buraxılıb, digərlərinin müalicəsi xəstəxanada davam etdirilir. Onlara zəruri tibbi xidmətlər göstərilib, vəziyyətləri stabildir.
Faktla bağlı “Yanğın təhlükəsizliyi qaydalarını pozma - ehtiyatsızlıqdan iki və daha çox şəxsin ölümünə səbəb olduqda” və “Səhlənkarlıq - ehtiyatsızlıqdan iki və daha çox şəxsin ölümünə səbəb olduqda” maddələri ilə cinayət işi açılıb.
