Bakı–Ağstafa–Bakı marşrutuna yeni reyslər əlavə olunub. Bu haqda bu gün, 13 iyun tarixində Bakuplus.az Azərbaycan Dəmir Yollarına istinadən xəbər verir.
Milli Qurtuluş Günü və Qurban bayramı ilə əlaqədar qeyri-iş günlərində sərnişin tələbatının qarşılanması məqsədilə xəttə əlavə 12 qatar reysi təyin edilib.
Marşrut üzrə təyin edilmiş qatarlar 14, 15, 17, 18 və 19 iyun tarixlərində hər iki istiqamətdə, 16 iyun tarixində isə bir istiqamətdə – Bakıdan Ağstafaya hərəkətdə olacaq.
Bununla yanaşı, 14 iyundan etibarən Bakı–Ağstafa–Bakı marşrutu üzrə müasir və komfortlu yeni “Stadler” qatarları hərəkətə başlayacaq. Sürətli qatarlar hər gün Bakıdan Ağstafaya saat 08:00 və saat 18:00-da, Ağstafadan Bakıya isə saat 08:20 və saat 18:20-də yola düşəcək. Həmçinin yeni qatarlara ilk dəfə olaraq Ləki və Ucar stansiyalarında da dayanacaq verilir.
