Bakı Hava Limanı xidmət etdiyi sərnişinlərin sayını açıqlayıb. Bu haqda bu gün, 25 oktyabr tarixində Bakuplus.az aeroporta istinadən xəbər verir.
Cari ilin ilk 9 ayında Heydər Əliyev Beynəlxalq Aeroportu 4 milyon 325 min sərnişinə xidmət edib. Bu, ötən ilin eyni dövrü ilə müqayisədə 25% çoxdur.
Beynəlxalq istiqamətlərdə daşınan sərnişinlərin 58,6%-i xarici aviadaşıyıcıların payına düşüb. Bu aviaşirkətlər 2 milyon 214 mindən çox sərnişin daşıyıb. Azərbaycan Hava Yolları isə 5 milyondan çox sərnişinə beynəlxalq uçuşlarda, 549.000 nəfər sərnişinə isə Naxçıvan istiqamətində xidmət göstərib.
Hava limanından ən çox sərnişin Bakıdan İstanbula və əks-istiqamətdə daşınıb. 9 ay ərzində 746.000 nəfər sözügedən istiqamətlərdə səfər edib. Digər pillələrdə ardıcıl olaraq, Naxçıvan, Moskva, Dubay və Tbilisi qərarlaşıb.
Heydər Əliyev Beynəlxalq Aeroportuna 37 aviaşirkət 70-ə yaxın istiqamətdə müntəzəm uçuşlar yerinə yetirib. Onlardan 18-i aşağıbüdcəli aviadaşıyıcılardır. Ən çox sərnişini “Turkish Airlines”, “AnadoluJet”, “Utair”, “Aeroflot” və “FlyDubai” şirkətləri daşıyıb.
