Bakı Ali Neft Məktəbində 8 Noyabr - Zəfər Gününə həsr olunmuş tədbir keçirilib. Bu haqda 5 noyabr tarixində Trend.az xəbər verib.
Tədbirdə şəhid ailələri, qazilər, Vətən müharibəsi iştirakçıları, millət vəkilləri, ictimai xadimlər, Ali Məktəbin müəllim-professor heyəti və tələbələri iştirak ediblər. Mərasimdə şəhid polkovnik-leytenant Raquf Orucovun həyat yoldaşı Sevinc Orucova, şəhid Camal İsmayılovun anası Filara İsmayılova qəhrəmanlar haqqında xatirələrini bölüşüblər. Vətən Müharibəsi qəhrəmanı Vüsal Yaqubov və Universitetin tələbəsi, Vətən müharibəsi iştirakçısı Rüfət Hüseynzadə isə döyüş yolundan danışıblar. Daha sonra "Zəfər yolu" qısametrajlı film nümayiş olunub.
"Vətənim Azərbaycandır" esse yazı müsabiqəsinin qalibləri mükafatlandırılıblar. Tədbir İkinci Qarabağ savaşında şəhid olmuş Rövşən Nurzadənin atası xalq artisti, aktyor Əli Nurun çıxışı və Dövlət Sərhəd Xidmətinin orkestrinin ifasında vətənpərvərlik ruhunda mahnılarla davam etdirilib.
