Bir müddət əvvəl Bakı–Şamaxı yolunda quraşdırılan yeni növ radarlar artıq işə salınıb. Bu haqda bu gün, 18 iyul tarixində Bakuplus.az Banker.az-a istinadən məlumat verir.
Quraşdırılmış elektron lövhələrdə yol üçün nəzərdə tutulmuş sürət limiti ilə yanaşı, sürət həddini aşan avtomobillərin sürəti və nömrə nişanı qeyd olunur.
Analoji qurğuların şəhər daxilində də quraşdırılacağı bildirilir.
Daxili İşlər Nazirliyinin rəsmisi, Elşad Hacıyevin sözlərinə görə, yeni monitorlar cərimə yazmır, yalnız sürücünü məlumatlandırır.
“Avtomobil yollarında quraşdırılan monitorlar sürücüləri məlumatlandıran rəqəmsal sistemdir. Yeni sistem cərimə və inzibati xətalarla bağlı qeydiyyat aparmır, yalnız sürücülərin təhlükəsizliyinə xidmət edir.
Bu monitorların quraşdırılmasında məqsəd hərəkət iştirakçılarının profilaktikası olmaqla, sürücülərin idarə etdikləri avtomobilin sürət göstəricisini əks etdirməsidir”, - Hacıyev dedi.
