Bakıda və ölkə ərazisində avqustun 29-da məktəbəqədər təhsil müəssisələrinə tərbiyəçi-müəllimlərin işə qəbulu üzrə müsabiqənin sınaq imtahanı mərhələsi başlayır. Bu haqda bu gün, 18 avqust tarixində Azərbaycan Respublikası Elm və Təhsil Nazirliyinin mətbuat xidməti məlumat verib.
Test imtahanlarında hər bir namizədə məzmun və metodika ilə bağlı 40 sual, pedaqoji və psixoloji yanaşma ilə bağlı 20 sual təklif olunur. Namizədlərə test suallarını cavablandırmaq üçün 120 dəqiqə vaxt verilir. Bu mərhələdə məzmun və metodika, eləcə də pedaqoji və psixoloji yanaşma ilə bağlı test tapşırıqlarının hər biri 1 balla hesablanacaq.
Ümumilikdə 60 ballıq qiymətləndirmə sistemi tətbiq olunacaq. Eləcə də pedaqoji və psixoloji yanaşmalarla bağlı hər bir səhv cavablandırılan test tapşırığı -0,25 balla qiymətləndiriləcək və namizədin imtahan nəticəsinə təsir edəcək.
Həmçinin, bu gün, 18 avqust tarixində Bakıdakı 18 nömrəli tam orta məktəbdə müəllimlərin işə qəbulu üzrə müsabiqə keçirilir.
