20 oktyabr-7 noyabr tarixlərində Bakıda arıçılıq məhsullarının 21-ci Respublika Sərgi-Satış Yarmarkası keçiriləcək. Bu haqda Kənd Təsərrüfatı Nazirliyinin mətbuat xidməti məlumat yayıb.
Yarmarka Kənd Təsərrüfatı Nazirliyinin və Azərbaycan Arıçılar Assosiasiyasının birgə təşkilatçılığı ilə Nərimanov rayonu, Fətəli xan Xoyski küçəsi, 5 ünvanında (“Gənclik” metro stansiyasının yaxınlığı) baş tutacaq.
Satıcı qismində iştirak etmək üçün əvvəlcədən qeydiyyatdan keçmək zəruridir. Qeydiyyatdan 25-29 sentyabr tarixlərində keçmək mümkün olacaq. Təsdiqlənmiş arıçılara 30 sentyabr tarixində SMS-bildirişlər göndəriləcək, onlara məhsullarını gətirməli olduqları tarix barədə məlumat veriləcək.
Yarmarkada maksimum 250 arıçının iştirak etməsi nəzərdə tutulur. Həmin arıçıların ən az 25 arı ailəsi olmalıdır. Bir arıçı yarmarkada ən çox 400 kq bal və 30 ədəd arı şanı satışa çıxara bilər.
Bal nümunələrinin qəbulu 4-12 oktyabr tarixləri arasında baş tutacaq. Yarmarkada ödəniş haqqı 150 manat təşkil edir. Bu məbləğə satış üçün yer və lazımi ləvazimatlarla təmin olunma, yarmarkanın marketinq işlərinin aparılması, loqistika, anbar işinin təşkili və digər xidmətlər daxildir.
Yarmarkada yalnız COVID-19 pasportuna və ya immun sertifikatına malik arıçılar iştirak edə biləcəklər. Satışa çıxarılacaq balların keyfiyyətinə Azərbaycan Qida Təhlükəsizlilyi Agentliyi nəzarət edəcək. Yalnız nümunələri Azərbaycan Qida Təhlükəsizliyi Agentliyi tərəfindən təsdiqlənmiş və standartlara uyğun olan məhsulların satışına icazə veriləcək.
