Paytaxtda dələduzluqda təqsirləndirilən məktəb direktoruna hökm oxunub. Bu haqda bu gün, 23 aprel tarixində Bakuplus.az Qafqazinfo-ya istinadən xəbər verir.
Bakı Ağır Cinayətlər Məhkəməsinin qərarına əsasən, 58 yaşlı Samirə Əkbərova 7 il azadlıqdan məhrum edilib.
S.Əkbərova müxtəlif illərdə Bakının 44 saylı, Abşeron rayonunun 5 saylı məktəblərində direktor vəzifəsində çalışıb. O, 44 saylı məktəbdə direktor işlədiyi vaxtda Arzu adlı tanışına onu paytaxtda məktəblərin birinə direktor təyin etdirəcəyini vəd edərək ondan 150.000 manat alıb. Daha sonra S.Əkbərova həmin qadına birgə uşaq bağçası açmaq adı ilə vəd verərək yenidən 150.000 manatını ələ keçirib.
Abşeron rayon Mehdiabad qəsəbə 5 saylı orta məktəbə rəhbərlik etdiyi vaxt isə S.Əkbərova digər şəxsə övladının Rusiyada aldığı diplomu nazirlikdə təsdiqlədəcəyini vəd edərək 6000 manat alıb.
Əlavə olaraq, S.Əkbərovaya qarşı mülki iddia da təmin edilib. Hökmdə ondan 300.000 manatın alınaraq zərərçəkmiş şəxsə ödənilməsi qeyd edilib.
