Bakıda bəzi abidələrdəki məlumat lövhələri yeniləri ilə əvəz olunacaq. Bu haqda bu gün, 11 aprel tarixində Report Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinə istinadən məlumat verib.
Aparılan monitorinqlər nəticəsində bəzi tarix və mədəniyyət abidələrində məlumat lövhələrinin yerləşdirilməsi texnikası və onlarda olan məlumatlarla bağlı mötəbər olmayan faktlar aşkar edilib.
Bəzi abidələrin mühafizəsinin lazımi qaydada qurulmadığı da müəyyən edilib. Hazırda qeyd olunanlar nəzərə alınaraq, məlumat lövhələrində olan məlumatların təhlili və dəqiqləşdirilməsi, əlavə məlumatların daxil edilməsi və yenilənməsi, mühafizə işinin gücləndirilməsi istiqamətlərində tədbirlər davam etdirilir.
Qurum qeyd edib ki, abidələrdən məlumat lövhələrinin götürülməsi binanın abidə statusunu itirməsi ilə deyil, həmin lövhələrdə aşkar edilən qüsurlarla bağlıdır. Araşdırma başa çatdıqdan sonra bu lövhələr yeniləri ilə əvəz olunacaq.
