Bakı-Qazax yolunda iri yük daşıyan avtomobil hündür olduğuna görə piyada keçidinin altından keçə bilməyib. Yük maşınının keçməsi üçün asfalt örtüyü qaşınaraq, yolun səviyyəsi qismən endirilib. Müvafiq kadrlar sosial şəbəkələrdə yayılıb. Bu haqda bu gün, 30 oktyabr tarixində Bakuplus.az məlumat verir.
Daxili İşlər Nazirliyindən (DİN) əldə olunan məlumata görə, yük elektrik turbin və generatordan ibarətdir. Daşınma müstəqillik dövrünün ən böyük elektrik stansiyasına çatdırılmışdır.
“Bununla bağlı müvafiq icazə alınıb. Eyni zamanda ümumi istifadədə olan avtomobil yolları ilə iriqabaritli yüklərin daşınmasına dair tələblər əsasında daşıma prosesi aidiyyəti qurumlarla birgə təhlükəsizlik qaydalarına riayət etməklə həyata keçirilib”, – məlumatda deyilir.
Azərbaycanda müstəqillik dövrünün ən böyük elektrik stansiyası tikilir. Mingəçevir şəhərində “Azərbaycan” İES-nin ərazisində yerləşəcək 1280 meqavat gücündə yeni elektrik stansiyasında tikinti işləri ölkədə ixtisaslaşmış yerli şirkətlər tərəfindən həyata keçirilir.
