Bakıda baş həkim qaynı tərəfindən döyülüb. Bu haqda bu gün, 24 oktyabr tarixində Bakuplus.az Oxu.az-a istinadən xəbər verir.
Hadisə Fətəli Xan Xoyski küçəsi, 112 ünvanında baş verib. “Yaşam” tibb mərkəzinin baş həkimi, kardioloq, professor Ceyhun Hacıyev işlədiyi xəstəxananın qarşısında qaynı Sahib tərəfindən döyülüb.
Bildirilir ki, Ceyhun Hacıyevin mərhum həyat yoldaşının adına Şamaxıda mənzil olub. Zenfira Hacıyevanın qardaşı Sahib bacısının vəfatından əvvəl onun adına 45.000 manat kredit götürmüş, əvəzində Şamaxıdakı evi bacısının adına keçirmişdi. Zenfiranın vəfatından sonra baş həkim evi qızı Leyla Hacıyevanın adına keçirib. Bundan narazı olan Sahib məhkəməyə müraciət edib, ancaq qərar baş hakimin xeyrinə verilib.
Bundan sonra Sahib Ceyhun Hacıyevin baş həkim işlədiyi “Yaşam” tibb mərkəzinə gedərək onunla görüşmək istəyib, ancaq buna nail olmayıb. İşdən sonra o, özünü Ceyhun Hacıyevin idarə etdiyi avtomobilin önünə atıb və baş həkimi döyməyə başlayıb.
Ceyhun Hacıyev qaynından şikayətçi olmayıb və sonuncuya 1000 AZN məbləğində cərimə tətbiq olunub.
