Bakıda cinsi azlıq adı altında quldurluq edən şəxslərə hökm oxunub. Bu haqda bu gün, 22 iyun tarixində Bakuplus.az Daxili İşlər Nazirliyinə istinadən xəbər verir.
Məhkəmənin qərarı ilə quldur dəstənin rəhbəri Sadiq Ovçiyev 10 il, eləcə də üzvləri - Ağababa Musayev 11 il 6 ay, Elnur Vəliyev 11 il, Nihat Rəhimli 11 il 6 ay, Aqşin Məmmədov 11 il 6 ay müddətinə azadlıqdan məhrum ediliblər. Sübhan Xanlarova isə elektron qolbaq taxılıb.
Sözügedən dəstə üzvləri sosial şəbəkələrdə saxta profil açaraq cinsi azlıq olduqlarını bildiriblər. Daha sonra müxtəlif şəxsləri Yasamal rayonunda yerləşən “Qanlıgöl” ərazisinə çağırıblar. Ərazidə isə həmin adamı təkləyib, onu döyüb, alçaldıcı hərəkətlər edərək videoya çəkiblər.
Dəstə İraqlı tələbənin şikayəti əsasında saxlanılıb. Araşdırma zamanı onların ümumilikdə 19 nəfərə qarşı quldurluq etdikləri məlum olub.
