Bakıda yeni Sosial Xidmət Mərkəzi fəaliyyətə başlayıb. Bu haqda bu gün, 28 may tarixində Bakuplus.az APA-ya istinadən xəbər verir.
Yasamal rayonunda, Həsənbəy Zərdabi prospekti, 87A ünvanında yerləşən Mərkəzdə sosial işçi, psixoloq, loqoped, sosial-pedaqoq, aktiv terapevt və digər mütəxəssislər tərəfindən 18 yaşınadək əlilliyi müəyyən edilmiş şəxslərə reabilitasiya xidmətləri göstəriləcək.
Ay ərzində 60-a yaxın uşağa xidmət göstərəcək mərkəz keyfiyyətli reabilitasiya xidmətləri göstərilməsi üçün xüsusi avadanlıq və ləvazimatlarla təchiz edilib.
Burada uşaqlar üçün fərdi və qrup şəklində sosial reabilitasiya xidmətləri təşkil ediləcək, valideynləri müvafiq təlimlərə cəlb olunacaqlar.
Mərkəzin açılışında Sosial Xidmətlər Agentliyinin idarə heyətinin sədri Vüqar Behbudov və Yasamal Rayon İcra Hakimiyyətinin başçısı Elşad Həsənov iştirak ediblər.
