Bakıda 5-8 dekabr tarixlərində Beynəlxalq Avtomobil Federasiyasının (FIA) Mükafatlandırma Mərasimi keçiriləcək. Bu haqda bu gün, 30 oktyabr tarixində Bakuplus.az Heydər Əliyev Fondunun mətbuat xidmətinə istinadən məlumat verir.
FIA-nın Mükafatlandırma Mərasimi avtomobil idmanı sahəsində ən nüfuzlu və gözlənilən tədbirlərdən biri hesab olunur.
Həmin günlərdə paytaxtda FIA Fondunun və avtomobil klublarının maraqlarını təmsil edən Beynəlxalq Turizm Alyansının (AIT) Baş Assambleyasının iclasları təşkil olunacaq.
Bu tədbirin Bakıda keçirilməsi barədə qərar ötən ilin dekabrında İtaliyanın Bolonya şəhərində FIA-nın Baş Assambleyasının iclasında qəbul edilib. Bir neçə ölkə, o cümlədən Azərbaycan bu beynəlxalq tədbirə ev sahibliyi etmək üçün mübarizə aparıb.
FIA-nın mükafatlandırma mərasimi 2011-ci ildən keçirilir. Qaliblər FIA-nın Baş Assambleyasının iclaslarının nəticələrinə əsasən müəyyən edilir.
