“Azərbaycan Hava Yolları” (AZAL) və “Türk Hava Yolları” (THY) Bakıda keçiriləcək 74-cü Beynəlxalq Astronavtika Konqresinin qonaqları üçün endirimli qiymətlərlə biletlər satacaq. Bu haqda bu gün, 12 aprel tarixində Report “Azərkosmos”a istinadən məlumat verib.
Rəqəmsal İnkişaf və Nəqliyyat Nazirliyi yanında “Azərkosmos” Kosmik Agentliyinin Beynəlxalq Astronavtika Konqresinə Hazırlıq Departamentinin direktoru Rəna Cəfərovanın sözlərinə görə, bununla bağlı artıq hər iki aviaşirkətlə razılıq əldə olunub.
Konqresdə 6 minə yaxın qonağın iştirakı gözlənilir. Ziyarətçilər üçün müxtəlif mədəni turların təşkili də planlaşdırılır. Konqresdə NASA, "Boeing", "Airbus" və digər şirkətlərin stendləri təqdim olunacaq.
74-cü Beynəlxalq Astronavtika Konqresinin 2023-cü il oktyabrın 2-6-da Bakıda keçirilməsi planlaşdırılır.
