Bakıda Azərbaycan Gənclər İqlim Konfransı keçirilib. Bu haqda BakuPlus.az Report-a istinadən bu gün, 5 may tarixində xəbər verir.
Azərbaycan Gənclər İqlim Konfransı Yer Günü 2022-yə həsr olunub.
İDEA İctimai Birliyi, Böyük Britaniyanın Azərbaycandakı Səfirliyi və ADA Universitetinin birgə təşkilatçılığı ilə baş tutan konfransda Böyük Britaniyanın Qlazqo şəhərində keçirilmiş BMT-nin İqlim Dəyişikliyi Konfransının (COP26) nəticələri nəzərdən keçirilib, iqlim böhranı ilə mübarizə yolları müzakirə olunub.
Həmçinin Azərbaycanda iqlim dəyişikliyi ilə mübarizə səyləri, qlobal istiləşmə probleminin həllində gənclərin rolu və liderlik perspektivlərinə dair təqdimatlar edilib və fikir mübadiləsi aparılıb.
Tədbirin ev sahibi kimi Böyük Britaniya bir sıra ambisiyalı iqlim öhdəliklərini qəbul etdiyini elan edib.
Hər il aprelin 22-də ətraf mühitin mühafizəsinə dəstək nümayiş etdirmək məqsədilə təşkil edilən Yer Günü 2022-ci ildə “Planetimizə investisiya edək” şüarı altında keçirilib.
