Paytaxt ərazisində ümumşəhər iməciliyi keçirilir. Bu haqda bu gün, 18 mart tarixində Bakuplus.az xəbər verir.
Keçirilən abadlıq-təmizlik işləri çərçivəsində prospekt və küçələrin, səki kənarlarının, bordürlərin, eləcə də işıq dirəklərinin, məhəccərlərin, bir sıra binaların fasadlarının, oturacaqların yuyulması və dezinfeksiya olunması həyata keçirilir.
Həmçinin ictimai iaşə, mağaza və digər obyektlərin əməkdaşları öz obyektlərinin fasad və vitrinlərinin yuyulması, onların qarşısında səliqə-sahman yaradılması işlərində fəallıq göstərirlər.
Bakı Şəhər Yaşıllaşdırma Təsərrüfatı Birliyinin əməkdaşları tərəfindən isə əsas magistral yol və prospektlərin kənarlarındakı ağacların dibi yumşaldılır, qurumuş budaqları budanır. Eyni zamanda şəhər ərazisində Abşeron iqliminə uyğun yeni ağaclar, kollar, güllər əkilir, yaşıllıq zolaqları və parklarda qazon örtüyünün yenilənməsi aparılır.
