Bakıda hipermarketə hücum edənlər ifadə veriblər. Bu haqda bu gün, 19 oktyabr tarixində Bakuplus.az APA-ya istinadən xəbər verir.
Təqsirləndirilən Dəyanət Qüdrətov bildirib ki, hadisədə Ruhlan İsmayılov ona hədə-qorxu gəldiyinə görə iştirak edib:
“2023-cü ilin yanvarında Ruhlanla görüşmüşdüm. Dedi: “Avtomat almaq istəyirəm, mənim adıma silah var, sənin adına alaq”. Sonradan planını mənə dedi. Bildirdi ki, belə bir planı var, 1 gün sonra razılıq verdim. Daha sonra fikrimdən daşınsam da, Ruhlan İsmayılov dedi ki, iştirak etməsəm, ya məni, ya da ailəmi öldürəcək”.
O bildirib ki, onlar basqını ikisi planlaşdırmışdı və pulları aralarında böləcəkdilər:
"Bravo" işini Ruhlanla ikimiz edəcəkdik. Başqa heç kimi bilmirdim. Ruhlanla bankdan 400.000 AZN pul götürmüşdük, pulu yarı böləcəkdik. “Bravo”nu Ruhlan İsmayılovla 2 gün izləmişik. Plana görə, Qala qəsəbəsinə getməli idik. Orada maşını yandırmalı idik”.
“Bravo”ya 1-ci mən girdim. Sonra Ruhlan qışqırdı ki, atəş aç. Qorxumdan silahdan 2 atəş açdım. 1-ci güllə bankomata dəydi. Sonra 2-ci güllə açılmadı. Mən bilərəkdən gülləni başqa yerə vurdum. Daha sonra qorxumdan oradan qaçdım. Taksiyə minib Sabunçuya getdim”, – deyə Dəyanət Qüdrətov əlavə edib.
Təqsirləndirilən özünü təqsirli bilməyib. Çünki əməli hədələndiyi üçün etdiyini qeyd edib. O, həmçinin Ruhlanın daha öncə “Kapital Bank”a başqa adamlarla hücum etmək istədiyini bildirib.
Məhkəmə 15 noyabr tarixində davam edəcək.
Cari ilin mart ayında bir qrup şəxs Xətai rayonunda hipermarketə silahlı basqın etmişdi.
