Bakı Gəmiqayırma zavodunda inşa edilmiş gəmi “ilin ən yaxşı bərə gəmisi” adına layiq görülüb. Bu haqda BakuPlus.az 16 fevral tarixində xəbər verir.
"Azərbaycan Xəzər Dəniz Gəmiçiliyi" QSC-nin (ASCO) sifarişi ilə "Bakı Gəmiqayırma Zavodu" MMC-də inşa edilmiş Ro-Pax tipli “Azərbaycan” gəmi-bərəsi "Baird Maritime"nin təşkil etdiyi 2021-ci ilin ən yaxşı gəmiləri siyahısında “ən yaxşı bərə gəmisi” kimi yer alıb.
Yükgötürmə qabiliyyətinə görə Xəzərdə hazırda mövcud bərələrdən böyük, 100 sərnişin, 56 sistern tipli vaqon və ya 50 yük avtomobili/Tır daşımaq imkanına malik olan gəmi ötən ilin mart ayında istismara verilib.
Gəmidə yük lifti, helikopter meydançası, dalğalı havada tarazlama sistemi (fin stabilizer) və iki ədəd dartıcı lokomotiv mövcuddur.
Bu möhtəşəm gəmi xüsusilə Xəzər dənizində xidmət etmək üçün inşa olunub.
