11 nömrəli İnteqrasiya Təlimli İnternat Məktəbinin direktoru pul mənimsədiyinə görə işdən azad edilib. Bu baradə 20 oktyabr tarixində aqreqator.az xəbər verib.
Təhsil naziri Emin Əmrullayev Gülnarə Abdullayevanı işdən azad edilməsi barədə əmr imzalayıb. Hazırda məktəbin direktoru vəzifəsini Namiq Kərimov icra edir.
Həmin məktəbin direktoru Gülnarə Abdullayeva 2020-ci ilin yanvar ayından 2021-ci ilin avqust ayınadək tək və məktəbin əməkdaşlarının köməyi ilə rəsmi sənədlərində saxta məlumatı yazaraq 88.622 manat pul mənimsəyib.
O, öz vəzifəsindən istifadə edərək işə gəlməyən müəllimlərin guya işə gəlməklə tədris həyata keçirməsi, müəllim və tərbiyəçilərin dərs saatlarının artıq göstərilməsi, gündəlik məktəbə gələn uşaq sayının artıq göstərilməsi ilə onların qidalanması üçün tələb olunan qida məhsulları və içməli suyun artıq rəsmiləşdirilməsi nəticəsində həmin məbləği nağdlaşdırmışdır.
Abdullayevanın otağında keçirilmiş baxış zamanı 4 plastik kart, işçilərə pul verməsi ilə bağlı qeydləri aşkar olunaraq ələ keçirilib.
Gülnarə Abdullayevaya qarşı külli miqdarda mənimsəmə, vəzifə səlahiyyətlərindən sui-istifadə və vəzifə saxtakarlığı maddələri ilə cinayət işi açılıb. Hazırda istintaq davam edir.
