“Küçə sənətçiləri” layihəsi ilə bağlı elan verilib
Dövlət Turizm Agentliyi xəbər verir ki, Bakı-Abşeron Regional Turizm İdarəsi "Küçə sənətçiləri" layihəsində iştirak etmək üçün müsabiqə elan edir.
20 qalib iştirakçı Bakı şəhərinin mərkəzində xüsusi ayrılmış çıxış yerlərində öz istedadlarını və sənətini sərbəst şəkildə nümayiş etdirə biləcəklər.
Layihənin müsabiqə mərhələsində qısa zaman çərçivəsində akrobatika, şarlardan müxtəlif formalı əşyaların düzəldilməsi, karikaturalar, klounluq, komediya, rəqs, ifaçılıq, sehrbazlıq, mim, pantomim, canlı heykəl, musiqi performansları, solo ifaçılar, 2 və 3 nəfərlik kiçik qruplar, kuklaçılıq, hekayə, şeir və ya nəsr oxuyanlar, o cümlədən eskiz və rəssamlıq kimi küçə sənəti, fotoqraflıq, xalça toxuma, küçə teatrı və s. ilə məşğul olan sənətçilər mütəxəssis sənətşünaslar tərəfindən seçiləcək.
Növbəti mərhələdə isə onlar müvafiq çıxış yerlərində yerləşdiriləcək və fəaliyyətlərinə nəzarət edilməklə sərbəst çıxış etmələri üçün şərait yaradılacaq.
Müsabiqənin seçim turu 2 mərhələdə keçirilir. 1-ci mərhələdə iştirakçıların onlayn olaraq təqdim etdikləri öz çıxışlarından ibarət 3 dəqiqəlik videoçarxlar mütəxəssislər tərəfindən müsbət və mənfi rəylər verilməklə qiymətləndiriləcək.
Müsbət rəy alan namizədlər 2-ci – əyani mərhələdə iştirak edəcəklər. Müsabiqənin əyani seçim turunda isə qiymətləndirmə 10 ballıq şkala üzrə aparılacaq və müvafiq dayanma yerlərinin sayına uyğun olaraq ən yüksək bal toplamış sənətçilər qalib olub, növbəti 6 ay ərzində layihədə iştirak etmək hüququ qazanacaqlar.
Müsabiqədə iştirak etmək istəyən şəxslər 28 avqust – 28 sentyabr tarixlərində aşağıda göstərilən telefon və elektron poçt vasitəsilə əlaqə yarada bilərlər.
📞Telefon: (+99412) 498 12 44
📧Elektron poçt: baku@tourism.gov.az
Müsabiqə qaydaları ilə buradan tanış olmaq olar.
[caption id="attachment_147939" align="alignnone" width="300"]
Foto DTA[/caption]
