Polis əməkdaşları tərəfindən ictimai nəqliyyatda, xüsusi ilə avtobuslarda tibbi maskalardan istifadə etməyən şəxslərlə profilaktik söhbətlər aparılıb. Bu barədə bu gün, AzTv reportaj hazırlayıb. Vətəndaşların diqqətinə çatdırılıb ki, ölkədə koronavirus xəstəlikləri ilə bağlı vəziyyət mürəkkəbləşib, sanitar-gigiyenik tələblərə əməl olunması daha da aktuallaşıb.
İctimai nəqliyyat vasitələrində və mağazalarda aparılan yoxlamalar zamanı pandemiya qaydalarına əməl etməyən xeyli şəxs aşkarlanıb. Pandemiya qaydalarına uyğun olaraq ictimai nəqliyyatda sərnişinlərin qoruyucu tibbi maskalardan istifadə etməsinə birbaşa nəzarət etməli olan sürücülərədə xəbərdarlıq edilib.
Daxili İşlər Nazirliyinin əməkdaşı Nurlan Əliyevin sözlərinə görə, bu obyektlərin girişində vətəndaşların 90 faizinə dezinfeksiyaedici vasitələr təklif olunmur, temperatur ölçən cihazlar yoxdur və ya işləmir.
Paytaxtda ictimai nəqliyyat, ticarət obyektləri və digər qapalı yerlərdə koronavirus əleyhinə qaydaların tələblərinə ciddi əməl olunmasına nəzarət və birgə reydlər bundan sonra da davam etdiriləcək.
